ପୁରୀ, ୯/୧୦ – ଆସ୍ଥାର ସହର ଶ୍ରୀକ୍ଷେତ୍ରରେ ପୁରୀବାସୀଙ୍କ ଶ୍ରୀମନ୍ଦିର ପ୍ରବେଶ ଓ ମହାପ୍ରଭୁଙ୍କ ଦର୍ଶନ ପାଇଁ ସ୍ଥାୟୀ ବ୍ୟବସ୍ଥା ଦାବିରେ ଚାଲିଥିବା ଅହିଂସାମୂଳକ ସତ୍ୟାଗ୍ରହ ଆଜି ୧୯୨ ଦିନରେ ପହଞ୍ଚିଛି। ଦୀର୍ଘ ଛଅ ମାସରୁ ଊର୍ଦ୍ଧ୍ୱ ସମୟ ଧରି ଅବିରତ ଭାବେ ଜାରି ରହିଥିବା ଏହି ପଦଯାତ୍ରା ପୁରୀବାସୀଙ୍କ ଅଗାଢ଼ ଭକ୍ତି, ଦୃଢ଼ ଇଚ୍ଛାଶକ୍ତି ଓ ନ୍ୟାୟସଙ୍ଗତ ଦାବି ପ୍ରତି ଅତୁଟ ନିଷ୍ଠାର ପ୍ରତୀକ ପାଲଟିଛି। ଉତ୍କଳ ଦିବସ ୧ ଅପ୍ରେଲରୁ ଆରମ୍ଭ ହୋଇଥିବା ଏହି ଜନସଚେତନତା ଅଭିଯାନରେ ପ୍ରତିଦିନ ସତ୍ୟାଗ୍ରହୀମାନେ ଭକ୍ତ ସାଲବେଗ ପୀଠରୁ ଶାନ୍ତିପୂର୍ଣ୍ଣ ପଦଯାତ୍ରାରେ ବାହାରି ସିଂହଦ୍ୱାର ନିକଟରେ ପହଞ୍ଚୁଛନ୍ତି। ପତିତପାବନଙ୍କୁ ଦର୍ଶନ କରି ମହାପ୍ରଭୁଙ୍କ ଉଦ୍ଦେଶ୍ୟରେ ପ୍ରାର୍ଥନା କରିବା ସହ ନିଜର ଦାବି ପ୍ରତି ପ୍ରଶାସନର ଦୃଷ୍ଟି ଆକର୍ଷଣ କରୁଛନ୍ତି। ଦିନ ବଦଳୁଛି, ପରିସ୍ଥିତି ବଦଳୁଛି, ହେଲେ ସେମାନଙ୍କ ମନରେ ଥିବା ଆଶା ଓ ବିଶ୍ୱାସ ଆଜି ବି ଅକ୍ଷୁଣ୍ଣ ରହିଛି।ପଦଯାତ୍ରୀ ସତ୍ୟାଗ୍ରହୀମାନଙ୍କ ମତରେ, ପୁରୀବାସୀଙ୍କ ଏହି ଆନ୍ଦୋଳନ କୌଣସି ଅତିରିକ୍ତ ସୁବିଧା ହାସଲ ପାଇଁ ନୁହେଁ; ବରଂ ନିଜ ଆରାଧ୍ୟ ମହାପ୍ରଭୁଙ୍କ ଦର୍ଶନ ପାଇଁ ଏକ ସୁଲଭ, ସୁବ୍ୟବସ୍ଥିତ ଓ ମର୍ଯ୍ୟାଦାଜନକ ସ୍ଥାୟୀ ବ୍ୟବସ୍ଥା ସୁନିଶ୍ଚିତ କରିବା ଏହାର ମୂଳ ଉଦ୍ଦେଶ୍ୟ। ଶ୍ରୀମନ୍ଦିରର ପରମ୍ପରା, ଶ୍ରୀକ୍ଷେତ୍ରର ସଂସ୍କୃତି ଓ ମହାପ୍ରଭୁଙ୍କ ସହ ପୁରୀବାସୀଙ୍କ ପିଢ଼ି ପିଢ଼ିର ଆଧ୍ୟାତ୍ମିକ ସମ୍ପର୍କକୁ ସମ୍ମାନ ଦେଇ ଏହି ଦାବିର ସମାଧାନ କରାଯିବା ଆବଶ୍ୟକ ବୋଲି ସେମାନେ ମତ ଦେଇଛନ୍ତି।ପଦଯାତ୍ରାର ଆବାହକ ସ୍ୱାଧୀନ କୁମାର ପଣ୍ଡା କହିଛନ୍ତି ଯେ, ଏତେ ଦିନ ଧରି ଆନ୍ଦୋଳନ ଚାଲିଥିଲେ ମଧ୍ୟ ସତ୍ୟାଗ୍ରହୀମାନେ ଶାନ୍ତି ଓ ଅହିଂସାର ପଥରୁ ବିଚ୍ୟୁତ ହୋଇନାହାନ୍ତି। ଆମର ଲକ୍ଷ୍ୟ କାହାକୁ ବିରୋଧ କରିବା ନୁହେଁ, ବରଂ ପୁରୀବାସୀଙ୍କ ଯଥାର୍ଥ ଦାବିକୁ ଗଣତାନ୍ତ୍ରିକ ପଦ୍ଧତିରେ ପୂରଣ କରାଇବା। ଆଲୋଚନା ଓ ସହମତି ମାଧ୍ୟମରେ ଏହି ସମସ୍ୟାର ସ୍ଥାୟୀ ସମାଧାନ ହେବ ବୋଲି ଆମେ ଆଶା ରଖିଛୁ। ଦାବି ପୂରଣ ନହେବା ପର୍ଯ୍ୟନ୍ତ ଆମର ଶାନ୍ତିପୂର୍ଣ୍ଣ ପଦଯାତ୍ରା ଜାରି ରହିବ।ଶୁକ୍ରବାର ଏହି ପଦଯାତ୍ରାରେ ସର୍ବଶ୍ରୀ ହରିଶଙ୍କର ମିଶ୍ର, ବିଶ୍ୱନାଥ ମିଶ୍ର, ନୃସିଂହନାଥ ନାୟକ, ପ୍ରକାଶ ଚନ୍ଦ୍ର ନାୟକ, ଜଗଦାନନ୍ଦ ରାୟ, ରମେଶ ଚନ୍ଦ୍ର ମହାନ୍ତି, ସନ୍ଧ୍ୟାରାଣୀ ମିଶ୍ର, ଅରୁଣା ପଟ୍ଟନାୟକ, ଅଞ୍ଜୁବାଳା ମହାନ୍ତି, ମମତା ଦାସ, ଅରୁନ୍ଧତି ବେହେରା, ମମତା ସ୍ୱାଇଁ, ଶିଶିରକାନ୍ତ ଶତପଥୀ, ଅଭିମନ୍ୟୁ ରାୟଗୁରୁ, ବରୁଣ ମହାପାତ୍ର, ଗଦାଧର ମହାରଣା, ସନ୍ତୋଷ ସେନାପତି, ସୁବାଷ ପଟ୍ଟନାୟକ ଓ ମାନସ ପଟ୍ଟନାୟକଙ୍କ ସମେତ ବହୁ ପଦଯାତ୍ରୀ ସାମିଲ ହୋଇଥିଲେ।ପୁରୀବାସୀଙ୍କ ନ୍ୟାୟସଙ୍ଗତ ଦାବି ପ୍ରତି ସହାନୁଭୂତିଶୀଳ ଦୃଷ୍ଟିକୋଣ ଗ୍ରହଣ କରି ଏହାର ସ୍ଥାୟୀ ସମାଧାନ କରିବାକୁ ସତ୍ୟାଗ୍ରହୀମାନେ ପୁନର୍ବାର ପ୍ରଶାସନକୁ ଆହ୍ୱାନ ଜଣାଇଛନ୍ତି। ସତ୍ୟ ଓ ଅହିଂସାର ପଥରେ ସଂଘର୍ଷ ଜାରି ରହିବ। ମହାପ୍ରଭୁଙ୍କ କୃପାରେ ନ୍ୟାୟସଙ୍ଗତ ଦାବି ପୂରଣ ହେବାର ଆଶା ନେଇ ସତ୍ୟାଗ୍ରହୀମାନେ ଆଗକୁ ବଢ଼ୁଛନ୍ତି।